ნარდი

ნარდი საქართველოში ყველაზე გავრცელებული სამაგიდო თამაშია: ორი მოთამაშე, თხუთმეტ-თხუთმეტი ქვა, ორი კამათელი და დაფა ოცდაოთხი ადგილით. აქ თამაშდება ის ნარდი, რომელსაც ქართულ მაგიდასთან თამაშობენ — ქვის მოკვლით, ბარით, მარსით და კოქსით.

დაფა და საწყისი განლაგება

• დაფა ოცდაოთხი ადგილია, ოთხ მეოთხედად: შენი სახლი, შენი ეზო, მოწინააღმდეგის ეზო და მოწინააღმდეგის სახლი.
• თითოეულს თხუთმეტი ქვა ჰყავს: ორი — მოწინააღმდეგის სახლის ბოლო ადგილზე, ხუთი — მის ეზოში, სამი — საკუთარ ეზოში და ხუთი — საკუთარ სახლში.
• ქვები ერთმანეთის შემხვედრად მოძრაობს: ყველა ქვა საკუთარი სახლისკენ მიდის.
• ეკრანზე შენი სახლი ყოველთვის ქვედა მარჯვენა მეოთხედია.

როგორ მიდის თამაში

1. ხელი იწყება თითო კამათლის გაგორებით. ვისაც მეტი მოუვა, ის იწყებს და სწორედ ამ ორ კამათელს თამაშობს. ტოლი რიცხვისას ორივე თავიდან აგორებს.
2. შემდეგ მოთამაშეები რიგრიგობით აგორებენ ორ კამათელს. თითო კამათელი თითო სვლაა: ერთი ქვა შეიძლება ორივეთი წავიდეს, ან ორი ქვა — თითო-თითოთი.
3. წყვილზე — როცა ორივე კამათელზე ერთი რიცხვია — ოთხი სვლა თამაშდება.
4. ქვა შეიძლება დადგეს ცარიელ ადგილზე, საკუთარ ქვებზე, ან იქ, სადაც მოწინააღმდეგის მხოლოდ ერთი ქვა დგას. ორი და მეტი ქვით დაკავებული ადგილი დაკეტილია.
5. თუ ორივე კამათლის თამაში შეიძლება, ორივე უნდა ითამაშო. თუ მხოლოდ ერთის — დიდი რიცხვი თამაშდება. თუ ვერცერთს თამაშობ, სვლა გადადის.

მოკვლა და ბარი

მარტო მდგომი ქვა დაუცველია. თუ მოწინააღმდეგე მასზე დადგება, ქვა „კვდება“ და ბარზე — დაფის შუა ზოლზე — გადადის. სანამ ბარზე ქვა გყავს, სხვა ქვით ვერ ითამაშებ: ჯერ ის უნდა „გააცოცხლო“, ანუ მოწინააღმდეგის სახლში შეიყვანო იმ ადგილზე, რომელსაც კამათელი აჩვენებს. თუ ის ადგილი დაკეტილია, ქვა ვერ შემოდის; თუ ყველა დაკეტილია, სვლა გადადის.

ქვების გაყვანა

როცა თხუთმეტივე ქვა საკუთარ სახლშია, იწყება გაყვანა. კამათლის რიცხვი იმ ადგილიდან გაიყვანს ქვას, რომელსაც ემთხვევა. თუ იმ ადგილზე ქვა არ დგას, უფრო შორი ადგილიდან უნდა ითამაშო; ხოლო თუ უფრო შორს აღარაფერი გყავს, ყველაზე შორს მდგომი ქვა გადის. თუ გაყვანის დროს ქვა მოგიკლეს, ის ჯერ უნდა გააცოცხლო და სახლში დააბრუნო.

ქულები: ოინი, მარსი და კოქსი

• ოინი — ერთი ქულა: წაგებულმა ერთი ქვა მაინც გაიყვანა.
• მარსი — ორი ქულა: წაგებულმა ვერცერთი ქვა ვერ გაიყვანა.
• კოქსი — სამი ქულა: წაგებულს ვერცერთი ქვა არ გაუყვანია და ერთი ქვა მაინც ჰყავს მკვდარი ან მოგებულის სახლში დარჩენილი.

მაგიდის შექმნისას ირჩევ, რამდენ ქულამდე ითამაშებთ: 1, 3, 5 ან 7. ერთქულიანი თამაში ერთი ხელია; გრძელ თამაშში მარსი და კოქსი ანგარიშს სწრაფად ცვლის.

როგორ ვითამაშო ეკრანზე

• შენს სვლაზე დააჭირე კამათლებს — სერვერი გააგორებს და ორივე მოთამაშე ერთსა და იმავეს დაინახავს.
• დააჭირე ქვას: გამოჩნდება ყველა ადგილი, სადაც მას ამ სვლაზე მისვლა შეუძლია. დააჭირე ადგილს და ქვა იქ გადავა.
• იმავე ქვაზე მეორედ დაჭერა მას დიდი კამათლით ათამაშებს, შემდეგი ქვა კი დარჩენილით ითამაშებს.
• სვლის დრო შეზღუდულია. თუ დრო ამოიწურა, ამ სვლას სერვერი დაასრულებს შენ მაგივრად.
• თამაშიდან გასვლა ან დანებება წაგებაა.

ტერმინები

• ქვა — სათამაშო ფიგურა; თითოეულს თხუთმეტი ჰყავს.
• კამათელი — ზარი. რიცხვების სახელებია: იაქი, დუ, სე, ჩარი, ფანჯი, შაში.
• წყვილი — ორივე კამათელზე ერთი რიცხვი: დუ-შაში, დუ-ბეში, დორ-ჩარი, დუ-სე, დუ-ბარა, იაგანი.
• სახლი — ბოლო მეოთხედი, საიდანაც ქვები გადის.
• ბარი — დაფის შუა ზოლი, სადაც მოკლული ქვა დგას.
• მოკვლა — მარტო მდგომ ქვაზე დადგომა.
• გაცოცხლება — მოკლული ქვის დაფაზე დაბრუნება.

ხშირად დასმული კითხვები

უფასოა?

დიახ. არის უფასო მაგიდებიც და Domino Coin-ზე მაგიდებიც — ქოინი ვირტუალურია და ფულზე არ იცვლება.

რომელი ნარდია — მოკლე თუ გრძელი?

მოკლე ნარდი, ქვის მოკვლით და ბარით — ის, რასაც ჩვეულებრივ უბრალოდ ნარდს ვეძახით. გრძელი ნარდი მოგვიანებით დაემატება.

ვინ აგორებს კამათელს?

სერვერი. რიცხვი შემთხვევითია და ორივე მოთამაშეს ერთდროულად ეჩვენება; ბრაუზერი მასზე ვერ მოქმედებს.

არის გაორმაგება (დავი)?

ჯერ არა. თამაში კლასიკური ქართული წესით მიდის — დავის გარეშე.

რა ხდება, თუ კავშირი გამეთიშა?

გაქვს დრო დასაბრუნებლად და თამაშს იქიდან აგრძელებ, სადაც გაჩერდა. თუ ვერ დაბრუნდი, თამაში წაგებულად ითვლება.

• დომინო — ითამაშე ონლაინ
• ჯოკერი — ითამაშე ონლაინ
• ყველა თამაში